דברים 28
משה מספר לבני ישראל את הברכות שיקבלו אם ישמעו למצוות אלוהים והאלות שתבא עליהם אם ימרו.
69
פסוקים
●
6
min
Bible version
1 והיה, אם-שמוע תשמע בקול יהוה אלוהיך, לשמור לעשות את-כל-מצוותיו, אשר אנוכי מצווך היום--ונתנך יהוה אלוהיך, עליון, על, כל-גויי הארץ.
2 ובאו עליך כל-הברכות האלה, והשיגוך: כי תשמע, בקול יהוה אלוהיך.
3 ברוך אתה, בעיר; וברוך אתה, בשדה.
4 ברוך פרי-בטנך ופרי אדמתך, ופרי בהמתך--שגר אלפיך, ועשתרות צאנך.
5 ברוך טנאך, ומשארתך.
6 ברוך אתה, בבואך; וברוך אתה, בצאתך.
7 ייתן יהוה את-אויביך הקמים עליך, ניגפים לפניך: בדרך אחד ייצאו אליך, ובשבעה דרכים ינוסו לפניך.
8 יצו יהוה איתך, את-הברכה, באסמיך, ובכול משלח ידך; ובירכך--בארץ, אשר-יהוה אלוהיך נותן לך.
9 יקימך יהוה לו לעם קדוש, כאשר נשבע-לך: כי תשמור, את-מצוות יהוה אלוהיך, והלכת, בדרכיו.
10 וראו כל-עמי הארץ, כי שם יהוה נקרא עליך; ויראו, ממך.
11 והותירך יהוה לטובה, בפרי בטנך ובפרי בהמתך ובפרי אדמתך--על, האדמה, אשר נשבע יהוה לאבותיך, לתת לך.
12 יפתח יהוה לך את-אוצרו הטוב את-השמיים, לתת מטר-ארצך בעיתו, ולברך, את כל-מעשה ידך; והלווית גויים רבים, ואתה לא תלווה.
13 ונתנך יהוה לראש, ולא לזנב, והיית רק למעלה, ולא תהיה למטה: כי-תשמע אל-מצוות יהוה אלוהיך, אשר אנוכי מצווך היום--לשמור ולעשות.
14 ולא תסור, מכל-הדברים אשר אנוכי מצווה אתכם היום--ימין ושמאל: ללכת, אחרי אלוהים אחרים--לעובדם. {פ}
15 והיה, אם-לא תשמע בקול יהוה אלוהיך, לשמור לעשות את-כל-מצוותיו וחוקותיו, אשר אנוכי מצווך היום--ובאו עליך כל-הקללות האלה, והשיגוך.
16 ארור אתה, בעיר; וארור אתה, בשדה.
17 ארור טנאך, ומשארתך.
18 ארור פרי-בטנך, ופרי אדמתך--שגר אלפיך, ועשתרות צאנך.
19 ארור אתה, בבואך; וארור אתה, בצאתך.
20 ישלח יהוה בך את-המארה את-המהומה, ואת-המגערת, בכל-משלח ידך, אשר תעשה--עד הישמדך ועד-אבודך מהר, מפני רוע מעלליך אשר עזבתני.
21 ידבק יהוה בך, את-הדבר--עד, כלותו אותך, מעל האדמה, אשר-אתה בא-שמה לרשתה.
22 יכך יהוה בשחפת ובקדחת ובדלקת, ובחרחור ובחרב, ובשידפון, וביירקון; ורדפוך, עד אובדך.
23 והיו שמיך אשר על-ראשך, נחושת; והארץ אשר-תחתיך, ברזל.
24 ייתן יהוה את-מטר ארצך, אבק ועפר: מן-השמיים יירד עליך, עד הישמדך.
25 ייתנך יהוה ניגף, לפני אויבך--בדרך אחד תצא אליו, ובשבעה דרכים תנוס לפניו; והיית לזעווה, לכול ממלכות הארץ.
26 והייתה נבלתך למאכל, לכל-עוף השמיים ולבהמת הארץ; ואין, מחריד.
27 יכך יהוה בשחין מצריים, ובטחורים, ובגרב, ובחרס--אשר לא-תוכל, להירפא.
28 יכך יהוה, בשיגעון ובעיוורון; ובתמהון, לבב.
29 והיית ממשש בצוהריים, כאשר ימשש העיוור באפילה, ולא תצליח, את-דרכיך; והיית אך עשוק וגזול, כל-הימים--ואין מושיע.
30 אישה תארש, ואיש אחר ישכבנה--בית תבנה, ולא-תשב בו; כרם תיטע, ולא תחללנו.
31 שורך טבוח לעיניך, ולא תאכל ממנו--חמורך גזול מלפניך, ולא ישוב לך; צאנך נתונות לאויביך, ואין לך מושיע.
32 בניך ובנותיך נתונים לעם אחר, ועיניך רואות, וכלות אליהם, כל-היום; ואין לאל, ידך.
33 פרי אדמתך וכל-יגיעך, יאכל עם אשר לא-ידעת; והיית, רק עשוק ורצוץ--כל-הימים.
34 והיית, משוגע, ממראה עיניך, אשר תראה.
35 יכך יהוה בשחין רע, על-הברכיים ועל-השוקיים, אשר לא-תוכל, להירפא--מכף רגלך, ועד קודקודך.
36 יולך יהוה אותך, ואת-מלכך אשר תקים עליך, אל-גוי, אשר לא-ידעת אתה ואבותיך; ועבדת שם אלוהים אחרים, עץ ואבן.
37 והיית לשמה, למשל ולשנינה--בכול, העמים, אשר-ינהגך יהוה, שמה.
38 זרע רב, תוציא השדה; ומעט תאסוף, כי יחסלנו הארבה.
39 כרמים תיטע, ועבדת; ויין לא-תשתה ולא תאגור, כי תאכלנו התולעת.
40 זיתים יהיו לך, בכל-גבולך; ושמן לא תסוך, כי יישל זיתך.
41 בנים ובנות, תוליד; ולא-יהיו לך, כי ילכו בשבי.
42 כל-עצך, ופרי אדמתך, יירש, הצלצל.
43 הגר אשר בקרבך, יעלה עליך מעלה מעלה; ואתה תרד, מטה מטה.
44 הוא ילווך, ואתה לא תלוונו; הוא יהיה לראש, ואתה תהיה לזנב.
45 ובאו עליך כל-הקללות האלה, ורדפוך והשיגוך, עד, הישמדך: כי-לא שמעת, בקול יהוה אלוהיך--לשמור מצוותיו וחוקותיו, אשר ציווך.
46 והיו בך, לאות ולמופת; ובזרעך, עד-עולם.
47 תחת, אשר לא-עבדת את-יהוה אלוהיך, בשמחה, ובטוב לבב--מרוב, כול.
48 ועבדת את-אויבך, אשר ישלחנו יהוה בך, ברעב ובצמא ובעירום, ובחוסר כול; ונתן עול ברזל, על-צווארך, עד השמידו, אותך.
49 יישא יהוה עליך גוי מרחוק מקצה הארץ, כאשר ידאה הנשר: גוי, אשר לא-תשמע לשונו.
50 גוי, עז פנים, אשר לא-יישא פנים לזקן, ונער לא יחון.
51 ואכל פרי בהמתך ופרי-אדמתך, עד הישמדך, אשר לא-ישאיר לך דגן תירוש ויצהר, שגר אלפיך ועשתרות צאנך--עד האבידו, אותך.
52 והצר לך בכל-שעריך, עד רדת חומותיך הגבוהות והבצורות, אשר אתה בוטח בהן, בכל-ארצך; והצר לך, בכל-שעריך, בכל-ארצך, אשר נתן יהוה אלוהיך לך.
53 ואכלת פרי-בטנך, בשר בניך ובנותיך, אשר נתן-לך, יהוה אלוהיך--במצור, ובמצוק, אשר-יציק לך, אויבך.
54 האיש הרך בך, והענוג מאוד--תרע עינו באחיו ובאשת חיקו, וביתר בניו אשר יותיר.
55 מתת לאחד מהם, מבשר בניו אשר יאכל, מבלי השאיר-לו, כול--במצור, ובמצוק, אשר יציק לך אויבך, בכל-שעריך.
56 הרכה בך והענוגה, אשר לא-ניסתה כף-רגלה הצג על-הארץ, מהתענג, ומרוך--תרע עינה באיש חיקה, ובבנה ובבתה.
57 ובשליתה היוצאת מבין רגליה, ובבניה אשר תלד, כי-תאכלם בחוסר-כול, בסתר--במצור, ובמצוק, אשר יציק לך אויבך, בשעריך.
58 אם-לא תשמור לעשות, את-כל-דברי התורה הזאת, הכתובים, בספר הזה: ליראה את-השם הנכבד והנורא, הזה--את, יהוה אלוהיך.
59 והפלא יהוה את-מכותך, ואת מכות זרעך: מכות גדולות ונאמנות, וחוליים רעים ונאמנים.
60 והשיב בך, את כל-מדווי מצריים, אשר יגורת, מפניהם; ודבקו, בך.
61 גם כל-חולי, וכל-מכה, אשר לא כתוב, בספר התורה הזאת--יעלם יהוה עליך, עד הישמדך.
62 ונשארתם, במתי מעט, תחת אשר הייתם, ככוכבי השמיים לרוב: כי-לא שמעת, בקול יהוה אלוהיך.
63 והיה כאשר-שש יהוה עליכם, להיטיב אתכם ולהרבות אתכם--כן ישיש יהוה עליכם, להאביד אתכם ולהשמיד אתכם; וניסחתם מעל האדמה, אשר-אתה בא-שמה לרשתה.
64 והפיצך יהוה בכל-העמים, מקצה הארץ ועד-קצה הארץ; ועבדת שם אלוהים אחרים, אשר לא-ידעת אתה ואבותיך--עץ ואבן.
65 ובגויים ההם לא תרגיע, ולא-יהיה מנוח לכף-רגלך; ונתן יהוה לך שם לב רגז, וכליון עיניים ודאבון נפש.
66 והיו חייך, תלואים לך מנגד; ופחדת לילה ויומם, ולא תאמין בחייך.
67 בבוקר תאמר מי-ייתן ערב, ובערב תאמר מי-ייתן בוקר--מפחד לבבך אשר תפחד, וממראה עיניך אשר תראה.
68 והשיבך יהוה מצריים, באונייות, בדרך אשר אמרתי לך, לא-תוסיף עוד לראותה; והתמכרתם שם לאויביך לעבדים ולשפחות, ואין קונה. {ס}
69 אלה דברי הברית אשר-ציווה יהוה את-משה, לכרות את-בני ישראל--בארץ מואב: מלבד הברית, אשר-כרת איתם בחורב. {פ}
פַּרשָׁנוּת
דברים כ"ח הוא פרק המתאר את הברכות והקללות שיבואו על בני ישראל בהתאם לציותם לפקודות ה'. הפרק מתחיל בתזכורת לברית שכרת ה' עם בני ישראל, ובהבטחה שאם ישמרו למצוותיו, הם יתברכו בארץ שנתן להם. הברכות שיבואו עליהם מתוארות בפירוט, לרבות ברכות חומריות כמו שפע יבולים, משק חי ועושר, וכן ברכות רוחניות כמו חיים ארוכים, הגנה מפני אויביהם ויחסים קרובים עם אלוהים. המחצית השנייה של הפרק מתארת את הקללות שיבואו על בני ישראל אם לא יצייתו למצוות ה'. הקללות הללו כוללות הרס של יבוליהם, מחלות ומוות, וכן גלות מהארץ שה' נתן להם. הפרק מסתיים בתזכורת שקללות אלו יבואו על בני ישראל אם לא יצייתו למצוות ה', ובאזהרה שלא יתפתו להסתלק ממנו. דברים כ"ח הם תזכורת רבת עוצמה לחשיבות הציות לפקודות ה'. היא משמשת אזהרה לבני ישראל שעליהם להישאר נאמנים לאלוהים כדי לקבל את ברכותיו, ושאי ציות יביא לקללותיו. זוהי תזכורת לכך שאלוהים הוא אלוהים אוהב וצודק, ושהוא יתגמל את מי שיציית לו ויעניש את מי שלא.
שאלות נפוצות
בהנחה שקורא עם מהירות קריאה ממוצעת של 300 WPM קורא את הספר של דברים, פרקים 28 זה ייקח בערך 6 דקות לסיום.
יש 69 verses in דברים, פרקים 28.